Orijen Ai-hun Natal nian

Ai-hun Natal nian hanesan tradisaun populár ne'ebé relasiona ho Natal. Baibain uza ai-kakeu ka ai-hun artifisiál ida. Hanesan tradisaun, sei enfeita ai-hun ne'e ho bola koloridu sira ka enfeita seluk ne'ebé relasionadu ho époka natal nian.

Sivilizasaun antigu sira ne'ebé helaa iha kontinente europeu no aziátiku iha miléniu datoluk antes Kristu nian konsidera ona ai-hun sira hanesan símbolu divinu ida no hala'o ona festivál ne'ebé relasiona ho sira. Fiar sira ne'e liga ai-hun sira ho personalidade mitolójiku nian. Ninia projesaun vertikál hahú hosi abut ne'ebé metin iha rai hatudu aliansa lalehan ho rai.

 

 

Iha Assíria ai-hun simboliza maromak Semiramis ne'ebé halo promesa ba asíriu sira, ne'ebé monta ai-hun ida ho enfeita no prezente sira iha ninia loron moris nian, sei hetan bénsaun ida.

Entre ejípsiu sira, sedru iha ligasaun ho Osíris. Ema gregu sira liga loureiru ba Apolo, abetu ba Átis no aziñeira ba Zeus. Ema jermániku sira tau prezente ba labarik sira iha ai-kakeu sagradu Odin nian.

Iha loron ida antes loron mosu iha invernu, povu ateu sira iha rejiaun báltiku sira ko'a ai-kakeu , lori ba sira ninia uma no enfeita hanesan ho saida maka ita halo ohin loron. Tradisaun ne'e pasa mós ba povu Jermániku sira. Ai-hun Natal dahuluk públiku ne'ebé hetan enfeita maka iha Riga, iha Letónia, iha tinan 1510.

Bainhira hahú sékulu XVIII, padre beneditanu ida Saun Bonifácio tenta hapara ho fiar ateu ida ne'ebé iha Turíngia. Nia ko'a ai-kakeu lulik ida ho baliu iha fatin aas sira foho nian. Tanba la hetan susesu hodi hapara fiar ne'e, nia desidi halo ligasaun ba formatu triangulár ai-kakeu nian ho Santíssima Trindade no ai-tahan sira ne'ebé rezistente ba eternidade Jesus nian. Nune'e maka mosu ai-hun Natal nian.

Fiar katak tradisaun ne'e hahú mós iha tinan 1530, iha Alemaña, ho Martinho Lutero. Bainhira iha kalan ida Lutero la'o iha ai-laran ida, nia hakfodak ho furak ai-kakeu sira ne'ebé jelu taka metin. Fitun sira iha lalehan ajuda hadi'a imajen ne'ebé Lutero halo ho ai-sanak sira iha ninia uma. Aleinde fitun sira, algodaun no enfeita sira seluk, nia uza mós lilin lakan hodi hatudu ba ninia família sira imajen furak ne'ebé nia haree iha ai-laran.

 

 

Ai-hun natal modernu mosu iha Alemaña entre sékulu XVI no XVIII, la hatene mosu loloos iha sidade ne'ebé. Durante sékulu XIX prátika ne'e mosu iha nasaun europeu sira seluk no iha Estadus Unidus. Maibé iha de'it sékulu XX maka tradisaun ne'e to'o iha Amérika Latina.

Agora daudaun, tradisaun ne'e hanesan normál iha katóliku, protestante no ortodoksu sira.

@SAPO Timor-Leste