Natal íha Timor

Natal tuir Timor nian hanesan loron ida ke ita festeja íha igreja no íha uma ho ita-nia familiar sira. Ho manas tropikal nian íha fulan Dezembru ema hotu-hotu ba haris íha tasi ka halo piknik ida. Lori kedas ona katupa, manu, bibi, fahi ka ikan lalar. Ìha Timor la íha naan peru ka bakallau ka bolu rei hanesan íha Portugal ka íha rai seluk.

 

Ambiente Natal íha Timor mos oinseluk tebes ho rai seluk nian. Foin tinan tolu ba kotuk mak ita haré ai-hun Natal no enfeitus Natal íha dalan ibun no liu-liu íha edifisiu Governu nian. Antes ida ne´é nunka se bele hetan enfeitus Natal nian, maibé haré hetan deit prezépiu hitoan íha bairu no uma sira sira, tuir kompetisaun ba prezépiu ida ke diak liu íha sidade laran. Tradisaun troka prézente mos la halo parte Natal íha Timor.

 

Tradisaun ida ke mos abut metin íha pvu Tiimor nia let mak Misa do Galo ka Misa íha loron 24 kalan. Ema hotu-hotu ba misa do Galo. Dalan íha Dili ka íha distritu tomak taka tomak ho ema lao ain, kareta no motor tuir dalan ba igreja. Íha misa do Galo íha katedral Baucau ka Dili nakonu ho ema husi rihun 2000 to´ó 4000.

 

Tradisaun Natal

 

Natal mosu hanesan loron ba sa Jesus Cristo, Maromak-oan moris, agora dadaun hanesan festa katólika ida ke importante tebes.Wainhira nia hahu, Igreja Katólika ladauk komemora Natal ida. Foin íha sékulu IV d.C. mak foin halo festa ba loron moris Kosok-oan Jesus, tuir data ida be Papa Júlio I fiksa ba, loron 25 fulan Dezembru, tamba nem ema ida hatene Nia loron moris lolos.

 

Tuir explikasaun balun, híli loron 25 fulan Dezembru hanesan loron Natal tamba tuir faktu loron ne´é mos koinsidi ho Saturnália romanu sira nian no ho festa jermánika no séltika sira nian ba tempu Invernu Solstísiu, festa sira ne´é hotu kedas festa pagan nian, Igreja haré katak oportunidade ida atu kristianiza tiha data ida ne´é, tau tuir nia planu no haluha loron sira ne´é niakonotasaun pagan. Fatin balun híli atu halo festa tuir akontesimentu loron 6 fulan Janeiru nian, katak, tuir lolos loron ne´é mak asosia liu ho Liurai Magus sira to´ó no Laos ho loron moris Jesus Cristo nian.

 

Nune´é Natal, hanesan, loron ida ke kristaun sira dedika ba Cristo, katak Loron-mana ba Justisa lolos mak ida ne´é (Mateus 17,2; Apocalipse 1,16), no transforma sai tiha festa sentral ida ba Igreja, kompara antes kedas ona ho loron Páskoa.

 

 

Laos deit hanesan festa kristaun sira nian ida, Natal ho tempu sai tiha festa familiar ida ho tradisaun pagan, balun jermánika no balun romanu. Ho influensia fransiskana, loron ne´é hafahé ba fatin barak, husi tinan 1233, kostume íha kristandade tomak, hahu hari´í prezépiu, tamba ida ne´é hatudu ona Sena loron moris Jesus nian. Ai-hun Natal mosu íha sékulu XVI, ai-hun ne´é íha enfeitu ho ahi-oan símbolu Cristo nian, Roman ba Mundu. Tradisaun ida tan konaba ba Natal mak troka prezente, katak prezente ne´é Aman-Natal ka kosok-oan Jesus mak fo tuir tradisaun rai ida-ida nian.

 

Ho tradisaun oin-oin sira ne´é ne´ebé mesak importante hotu kedas (Natal se la sai hanesan Natal se ita la halo tuir), tuir lolos ita mak labele haluha signifikadu lolos husi Natal b asa loron moris Jesus Cristo, ke mai íha mundu ho hakarak ida deit: atu justifika ita-nia pekadu liu husi nia mate rasik. Íha tempu sira néba sempre wainhíra ema balun halo pekadu ka salan no hakarak atu hetan perdaun divinu, nia sei halo oferta ho forma sakrifisiu bibi-oan ida. Nune´é, Maromak haruka Jesus Cristo hanesan bibi-oan oan la-ho pekadu, mai íha mundu atu hamos pekadu ba Umanidade tomak liu husi Nia mate, atu nune´é ita bele hetan moris rohan-laek, tuir Jesus, Maromak nia oan nia intermédiu.