Ema portugés sira hakarak uza liu rede sosiál hodi hakerek postál Natal nian

Iha oras hodi hato'o ksolok festa nian, Portugal hanesan nasaun ida hosi Europa ne'ebé uza liu teknolojia foun sira iha époka festa ne'e hodi troka postál tradisionál sira Natal nian, haktuir iha estudu ida hosi Microsoft.


 

Tuir estudu, liu hosi 97% hosi ema portugés sira admiti uza rede sosiál sira hodi haruka mensajen sira festa nian ba família no belun sira, no 85% hatete katak hasai selfie hodi haruka hanesan postál no 55% admiti katak hasai fotografia ba sira nia prezente Natal nian.

 

Estudu fó sai mós katak teknolojia aumenta nia knaar importante liu iha ema portugés sira nia moris loron-loron. Iha peskiza hosi vídeo no reseita sira ba jantar kalan Natal nian, rede sosiál sira no plataforma online sira sai importante ba 91% hosi ema sira ne'e.

 

SMS sai mós hanesan dalan seluk ida hodi hato'o ksolok festa nian ho 89% hosi ema portugés sira maka uza solusaun ne'e. La hanesan ho fatin seluk, Áustria (30%) no Suisa (34%) sai hanesan nasaun sira ne'ebé ladún uza teknolojia foun sira.

 

Iha Europa besik 76% hosi ema sira tuir estudu ne'e hakarak hasai selfie ho família iha meza jantar Natal nian ka ho prezente sira ne'ebé sira simu iha kalan Natal nian.

 

Maski video call konsidera hanesan solusaun ne'ebé di'ak hodi komunika ho família no belun sira, iha de'it ema europeu 23% maka uza dalan ida ne'e.

 

Estudu hosi Microsoft fó sai mós katak ema europeu balun konsidera le email ka mensajen serbisu nian iha loron Natal nian. Maibé, barak liu kontinua respeita objetivu hosi loron ne'e, uza teknolojia hodi hato'o de'it felisidade ba ema sira koñesidu sira.