Tradisaun sira iha mundu hodi selebra loron Liurai Na'in Tolu

Loron 06 Janeiru hanesan loron ne'ebé selebra figura liurai na'in tolu nian: Gaspar, Baltazar no Belchior. Maibé oinsá maka tradisaun ne'e selebra iha mundu tomak? Hatene iha ne'e rezumu balun:

 

 

Portugal
Iha nasaun ne'e baibain han bolu-rei. Iha tempu balun liubá bolu ne'e kontén fava ida, ne'ebé ema ida ne'ebé hetan tenki halo bolu-rei iha tinan tuirmai, no brinde ida. Aleinde bolu-rei, variasaun seluk hetan destake iha tinan hirak ikus ne'e maka bolu-raiña ka bolu ne'ebé laiha ai-fuan kristalizadu.
Iha zona balun iha Portugal koñesidu bot hábitu ida ho naran "cantar as Janeiras", ne'ebé grupu ida desloka ba estrada hodi kanta liuhosi uma sira. Tradisaun ne'e hahú hosi loron 01 no, baibain, hanaruk to'o loron 06 Janeiru, iha parte balun nasaun nian bele akontese iha fulan-Janeiru tomak.

 

Arjentina & Uruguai
Iha "Día de Reyes" baibain labarik sira husik sapatu ida iha odamatan ho duut no bee ba kamelu sira hosi Liurai Na'in tolu nian. Iha nasaun ne'e baibain han bolu ida ne'ebé koñesidu ho naran "Rosca de Reyes", ne'ebé hanesan ho bolu-rei hosi Portugal.

 

Itália
Iha nasaun ne'e tradisaun koñesidu liu ba loron ne'e maka "Befana". Iha ne'e, señora ferik ida maka fahe prenda ba labarik sira no la'ós Pai Natal.

 

Finlándia
Hodi komemora "loppiainen", ema findalés sira iha tradisaun halo bolaxa sira hosi ai-lia ho forma fitun ne'ebé koñesidu ho naran "Piparkakut", iha tempu hanesan sira halo mós dezeju. Tuir tradisaun bolxa sira tenki fahe ba pedasuk tolu, iha liman laran, no tenki hahán nonook hodi nune'e bele hetan dezeju.

 

 

Bulgária
Iha loron ne'e, padre ida so'e ba bee laran krús ida ne'ebé halo hosi ai no ema mane sira ne'ebé katuas liu tenki mergulla hodi foti krús ne'e. Tanba tradisaun ne'e akontese iha tempu ne'ebé bee iha nasaun ne'e malirin tebes, tuir lenda populár katak ema ne'ebé konsege hetan krús sei iha saúde di'ak no sorte maka'as.

 

Eslovénia
Iha parte balun iha nasaun ne'e, hahú loron 01 to'o 06 Janeiru nia tradisaun maka labarik sira tenki tuku odamatan iha uma sira hodi husu améndoa, ai-fuan figu maran no dose sira seluk.

 

Estadus Unidus
Iha estadu Louisiana, Loron Liurai Na'in Tolu marka inísiu ba preparasaun sira Karnavál nian. Baibain han "King Cake" ne'ebé hanesan ho bolu-rei hosi Portugal, to'o selebrasaun hosi "Mardi Gras" ka Loron-Tersa Bokur.

 

 

Brazil
Folia dos Reis hanesan manifestasaun relijiozu ida ne'ebé ema katóliku sira halo. Grupu sira halibur hamutuk hodi toka instrumentu oioin, hodi tuir hosi orden sira hosi Mestre Folia nian.

 

Fransa
Nasaun ne'e nia tradisaun maka han bolu "Galette des Rois" ne'ebé halo ho baze améndoa ka masán.

 

Grésia
Hanesan ho Bulgária, selebrasau ba loron ne'e relasionadu mós ho bénsaun bee sira nian. Komemorasaun sira kontinua to'o loron 07 Janeiru ne'ebé hanesan loron hodi selebra São João Batista.

 

Irlanda
Iha loron ne'e konsidera hanesan Natal Feto sira nian, ne'ebé feto sira tenki deskansa iha loron ne'e hafoin serbisu ne'ebé sira halo entre Natal no Tinan Foun. Nia tradisaun maka grupu sira feto nian halibur hamutuk hodi fahe refeisaun ida ba loron ne'e.

 

Malta
Iha nasaun ne'e, loron ne'e selebra iha loron-domingu dahuluk iha fulan ne'ebé baibain halo konsertu sira ne'ebé hanesan konsertu ida halo hosi Orkestra Nasionál nasaun ne'e nian.

 

 

Holanda, Béljika ka Luxemburgu
Iha nasaun sira ne'e baibain grupu ida ho labarik na'in tolu, hanesan homenajen ba liurai na'in tolu, la'o liuhosi uma sira hodi kanta knananuk sira selebrasaun ba loron ida ne'e. Hafoin kanta tiha sira simu osan ka dose ruma.

 

España
Iha nasaun ne'e, baibain han "Rosca de Reyes", bolu ida ne'ebé hanesan ho bolu-rei. Iha loron 06 Janeiru mós ema españól sira iha tradisaun hodi troka prenda sira.

 

Rúsia
Iha nasaun ne'e, igreja ortodoxa selebra batizadu Jesus Kristu nian no iha loron 19 Janeiru sei halo mós bénsaun ba bee sira.

 

Suésia
Iha loron 06 Janeiru selebra loron 13 hafoin Natal, nune'e hanesan feriadu iha nasaun ne'e, no selebrasaun sira halo to'o loron 13 Janeiru.

 

Méxiku
Tuir tradisaun sira hosi nasaun sira hanesan España, Arjentina no Uruguai, iha loron ne'e mós troka prenda sira ho han "Rosca de Reyes".

 

Eritreia & Etiópia
Iha nasaun sira ne'e selebrasaun asinala Timkat, iha loron 19 Janeiru, ne'ebé sei halo prosisaun ida no bénsaun ba bee sira.