Istória labarik-mane ida ne'ebé konkretiza nia hakarak ikus hodi koñese Pai Natal

Koñese Pai Natal. Ne'e hanesan hakarak hosi labarik-mane ida ho tinan lima ne'ebé internadu iha Kuidadu Intensivu hosi ospital ida iha Tennessee, Estadus Unidus. Istória ne'e komove daudaun mundu. 

 

Labarik-mane, ne'ebé nia naran la fó sai ida, ko'alia ba enfermeira ida, ne'ebé haree nia hodi fó kuidadu médiku, katak nia hakarak atu koñese Pai Natal. Bainhira hatene, auxiliar ne'e liga ba Eric Schmitt-Matzen, enjeñeiru mekániku ida ne'ebé iha tinan barak nia laran hatais hanesan Pai Natal iha atividade oioin natal nian.

 

créditos: Facebook/eric.schmittmatzen

 

Bainhira hatene estadu saúde ne'ebé delikadu hosi labarik-mane ne'e, Eric ba to'o ospital ne'ebé, ho konsentimentu família nian, la'o ba kuartu iha Unidade Kuidadu Intensivu ne'ebé labarik ne'e internadu.

 

"Bainhira ha'u tama iha kuartu, nia toba hela no fraku tebes hanesan atu besik duku", enjeñeiru mekániku ho tinan 60 resin ba jornal Knoxville News Sentinel. Hafoin hakbesik ba labarik-mane ne'e nia hatete nune'e: "Ha'u rona dehan ó sei lakon Natal, loos ka? Ne'e labele akontese tanba ó hanesan ha'u nia Elfo númeru ida".

 

Ho de'it suspensóriu sira Pai Natal nian, Eric oferese prezente ida ba labarik-mane ne'ebé hafoin ho susar tebes loke hatete ba nia katak nia sei mate. "Oinsá maka ha'u hatene katak ha'u to'o iha fatin ne'ebé ha'u sei ba?", labarik-mane ne'e husu ba Schmitt-Matzen no nia hatán: "Bainhira ó to'o iha ne'ebá, ó hatete ba sira katak ó maka Elfo númeru ida Pai Natal nian no ha'u hatene katak sira sei husik ó tama".

 

Hafoin konversa badak, Eric hakohak labarik-mane ne'ebé mate iha nia liman-laran ho akompañamentu triste hosi família. "Ha'u tinan haat iha Ezérsitu no ha'u haree ona buat barak. Maibé ha'u atravesa koredor enfermajen nain ho tanis. Ha'u hatene katak enfermeiru sira no médiku sira asisti kazu sira ne'e loron-loron, maibé ha'u la hatene oinsá maka sira aguenta", nia hatete.

 

Ho triste maka'as ba momentu ne'ebé nia asisti, Eric hanoin atu husik nia serbisu nu'udar Pai Natal, hobby ida ne'ebé halo nia okupadu iha momentu natalísiu nian.

 

"Ha'u demora besik semana rua hodi konsege para hodi hanoin beibeik akontesimentu ne'e. Ha'u hanoin katak sei la aguenta no sei la konsege halo tan Pai Natal", nia hatete. Maibé nia hatutan katak hanesan nia eventu ida ikus ida ne'ebé fó forsa ho korajen ba nia hodi la'o ba oin ho misaun ida iha nia moris: halo ksolok labarik millaun resin nia moris.

 

Bainhira ha'u haree sira nia hamnasa, ne'e halo ha'u muda ideia sira. Ha'u hatene signifikadu hosi knaar ne'ebé ha'u halo ba sira no ba ha'u".

 

Fonte: SAPO Lifestyle