Quarta-feira, 09.12.15

Karta sira ne'ebé selebridade hakerek ba Pai Natal

Benedict Cumberbatch, Annie Lennox, Thom Yorke, no famozu sira seluk hakerek ona karta sira ba Pai Natal ba eventu “Live National Letter Writing Day", iha Reinu Unidu.


EPA@ Uwe Zucchi

 

Organizasaun "Letters Live" aproveita ona hodi, liuhosi karta sira ne'e, fó sai nia programa ba 2016, iha eventu anuál ida ne'ebé hakarak selebra poder korespondénsia literáriu nian.

 

 

Atór Benedict Cumberbatch hanesan naran koñesidu ida ne'ebé tama iha lista eskriba sira nian. Aleinde fó hanoin Pai Natak katak nia nunka simu espada lakan ida ne'ebé nia husu bainhira nia sei ki'ik, nia foka nia dezeju sira ba labarik ki'ik sira: "Maski Maromak hatene katak ita presiza ajuda tomak...ó (Pai Natal) ezisti ba labarik sira. Labarik sira ne'ebé presiza majia ruma iha mundu ida ne'ebé fronteira entre inosénsia ho responsabilidade, halimar bosok no malirin hosi obstákulu sira hosi ema adultu nian, ladún iha. Nune'e maka ha'u hakarak husu ó nia ajuda. Aumenta tan tempu balun hodi labarik sira ne'e sai hanesan labarik duni".

 

Atór husu mós ajuda espesiál ida ba labarik sira "ne'ebé preokupa ho sira nia família sira, ne'ebé terus tanba moras ruma, tanba hamlaha no kiak. Liuliu ba sira ne'ebé subar iha edifísiu sira bainhira bomba sira tuun ka tama iha ró ida ho malirin ka tauk, hodi bele halai hosi dezastre naturál ka hosi funu ida. Halo favór, ajuda ami hodi halo naroman sira nia mundu ho momentu ksolok no esperansa nian".

Atór hakotu nia karta hodi hatete katak nia halo saida maka nia lakohi halo, husu tulun hodi rezolve "problema sira hosi adultu sira nian".

 

Thom Yorke, vokalista hosi Radiohead, husu ona: tinan ne'e, Pai Natal bele "la fó prezente sira ba ezekutivu sira hosi kompañia petrolíferu sira no ba polítiku sira ne'ebé sosa sira?". Yorke halo mós pedidu modestu ida ba nia aan rasik: "no ba ha'u, ókulu ida hodi le...kór azul".

 

Annie Lennox haruka nia dezeju sira ba refujiadu sira, hodi husu ba señór simpátiku ho hasan-rahun mutin bele muda mundu no halo atu "jerasaun tomak lalika halai sai hosi sira nia uma, hosi sira nia sidade, vila ka aldeia sira, iha nasaun sira ne'ebé hetan estraga tanba funu, hahú hosi Síria to'o Nijéria...". Kantora hatutan mós: "Liuhosi dalan kariñu ida ó bele tau sanidade balun no kompaixaun iha fuan sira hosi ema kriminozu profeta sira ódio nian, hosi oho no funu? Obrigada, Pai Natal".

Quinta-feira, 03.12.15

Tanba sá maka labarik sira tenke hakerek karta ida ba Pai Natál?

Espesialista sira fó sai razaun oioin. Alénde atu halo estimulasaun no dezenvolvimentu ba gistu hodi hakerek, bele mos sai nu’udar papel pedagójika ida

 

Iha tempu ne’e, labarik barak maka hakerek karta ba Pai Natál, ho lista brinkedu ne’ebé sira hakarak atu simu hanesan prezente. Karik, ita bot nia ladauk hakerek karta iha tinan ne’e, entaun insentiva ba. Tanba alénde estimula no dezenvolve gostu atu hakerek, ho jestu ne’e mos halo ita bele hatene ita-nia oan ninia gostu nomós preferénsia balun, inklui laobriga ita atu sosa prezente ne’ebé ba nia ladun di’ak.


Ikus mai, molok atu haruka, lee hamutuk fali saida maka nia hakerek no diskuti kona-ba karta ninia konteúdu. Aproveita hodi sensibiliza ita-ninia oan, prezente hirak ne’ebé ladun importante iha moris ne’e. Esplika mos ba nia katak labarik balun ladun sente ho natál ne’e no kona-ba labarik kiik sira-ninia moris. Ho nune’e bele hametin liu tan lasu ka relasaun no fahe esperiénsia ne’ebé imi-nia oan sei nunka atu haluha.


Maski fó insentivasaun hodi halo pedidu ba Pai Natál, maibé tuir pediatra Mário Cordeiro katak ida ne’e mos hanesan oportunidade di’ak ida hodi desmifika parte konsumista hosi époka ne’e, «tanba karta ba Pai Natál la’os hanesan lista ezizénsia nomós lista kazamentu nian ida ba inan-aman ka família sira atu kumpri. Maibé nu’udar espresaun ba dezeju nian de’it», esplika espesialista ne’e.


SAPO TL ho Lusa

pesquisar

 

Perguntas de Natal

tags

blogs SAPO